येशुको जन्म
इजरायलि कि ग्यासारु ह्यान मिकि ग्यालसाकि ग्याल्बु तिवा ग्याल्सा बितुङमा होगतोक । होति कि लो गजिन तिङला रोमकि ग्याल्बु ति इजरायलि कि त्याङरु ग्याल्सा बितुङमा होगतोक होति गोटोला इजरायलि ह्युल चिक रु ङन्ला दाउद ग्यालबु कि सन्तन योशेफ सकान मि चिक होगतोक । होतिरु इजरायलिकि भुमु मरियम ला योशेप कि पाङमा केल्ज्या सुना रेस्योगतक । त्ये निजिक त्याङला कि कोन्ज्योक ख्यो न्याबु होताराक । ख्यो स्वाक खुरज्याराक भुजा चिक केयारक होति भुजा ति चा छ्योबु हुङज्याराक ।खोला कोन्ज्योक कि भुजा सच्याराक कोन्ज्योक लाक्तु खोला खुईरिङ ग्याल्बु दाउद च्योरि ग्याल्बु जोयाराक । खुई ग्याल्सा ति नाम चिक मिसिदेयाराक सुना मागोतक । त्ये मरेयम ति मागोतक ङा नज्युङमा पाङमाला मफिदा मि कन्तिलामला काटा केयाराक्पा सुना मागोतक । होति तिङला स्यापताक डुप्कान लाक्तु मरेयमला मागोतक होति कोन्ज्योक कि हित्की स्युक लाक्तु हुङज्याराक सुना मागोतक ।त्या कोतोला मरियाम ति स्वा खुरगोतक । होति स्वा खुरकोरा ति योशेप ति छ्या ज्युगोतक छ्या ज्युङतानि सोङकाङ माथोङबा योशेप ति मरियामला लो तोङमान सम्गोतक । निन्जिक योशेप ति न्याल न्याल कोटोला मिलामला त्याङला कि स्यापताक डुपकान ति हुङनारु मागोतक व योशेप ख्यो मरेयामला पाङमा केल्ज्याला माजिक मारेयमला कोन्ज्योक कि सम कि स्युक लाम्ला स्वाक खुरखुरा दाक । खो लाक्तु काटा चिक केयाराक होति काटा कि मिन ति येशु पोर ।खो लाक्तु मि तिवाला दिक्पा नाई टोल्ज्याराक सुना मागोतक । त्या तिङला योशेप ति मरेयामला पाङमा क्यालगोतक । पाङमा क्याल तानि काटा के के टुक्सि खोवा साउ न्याबु मान्यालगोतक । त्या तिङला रोमकि ग्याल्बु ति मि गाङसिला निङबा कि मिकि ह्यु कि मि कि ह्युल नाई कि मिन दर्ता बितु सोङ सुना मागोतक । योशेप ति दाउद कि सन्तन हिदाकि लाक्तु खोवा बेथलियम सगान साज्यारु ढोया ज्युगोतक । त्या तिङला योशेफ ति मरियामला खेरनारु बेथलियम सगान साज्यारु फिन्गोतक ।होति ना मि मोङबु हुङस्योगोतक खोवाला दोत्सा माज्योरगोतक । खोवा ति दोत्सा माज्योरतानि रा चिकरु दात्कोतक । त्याति गोटतोला मरेयामला भुजा चिक केगोतक । होति काटा तिला सुल्बुवा ढेनारु छ्याज्युङरु भोरगोतक । त्या तिङला कि स्याकताप ढुप्कान ति त्या छउकि छामुन ति होतिकि डामडुमबा होता लङजाकि ङान्ला थोन्गोतक ।लङजा तिवा मागोतक दिरिङ दाउदकि ह्युलना ख्याला क्योप्कान चिक केसुनाङ सुना मागोतक । खो ति कोन्ज्योक क लाक्तु चुनि च्याच्यावा ग्याल्बु दाक । खोला सुल्बुवा ढेनारु छ्याज्युङना न्यालसुनाङ सुना मागोतक ।त्ये लङजातिवा तापाताप खोवा फिन्गोतक । फईना होति तिङला कि स्यापताक डुप्कान ति मामावा च्योरि खोवा ति थोङगोतक । हो ति नाइ खोवा गाङसि गरि सिनारु कोन्ज्योक कि खाबु तोङगिन्दु हुङगोतक । त्या तिङला योशेप ति होति पुजाकि मिन ति येशु पोरगोक । होति येशु कि मिनकि दोन ति कोन्ज्योक लाक्तु क्योपकान हिनगोतक ।
