अब्राहाम
नोहा राङ खुई पाङमा ति सि तानि खुई भुजा कि भुजा तिवा कि मिराप मोङबु तिङला जम्बुलिङला मि मोङबु फेल्गोतक ।त्ये होति मितिवाकि कोन्ज्योक नाईकि थाक रिङबु रिङबु फिन्नारु कोन्ज्योक कि माना मान्यागान ज्युगोतक ।त्ये कोन्ज्योक खोरोङ जोजोवा मितिवाला निङजि बिगान ज्युङगोतक ।त्ये कोन्ज्योक लाक्तु अब्राहम सगान मि चिक छानि ज्यागोतक। होति अब्राहम कि पाङमा कि मिन साहारई हिन्गोतक ।खोवाला भुजा भुमु मेगोतक।निजिक कोन्ज्योक लाक्तु अब्राहमला मागोतक । व अब्राहम खि आयाकि खङबा ह्युल तोङपा तिवा लो ताङनारु ङा मामावा साज्यरु सोङ सुना मागोतक । ख्यो लाम्ला ग्युक्पा छ्योबु चिक जोवान ।त्ये यि सा जम्बुलिङ गि ग्युक्पा गाङसि कि मि तिवाला खि लाम्ला मोलाम थेप्चयाराक सुना मागोतक । त्या तिङला अब्राहम लाक्तु कोन्ज्योक कि माना न्याननारु खुई पाङमा साहाराई ला खेर नरु कोन्ज्योक लाक्तु मामावा साज्यरु फिन्गोतक । फिन्तानि होति गि लो न्युङसय तिङला कोन्ज्योक लाक्तु अब्राहमला मागोतक । व अब्राहम ख्यो खि मिक कि थोङ न्यकान गाङसि साज्या ति खि सन्तन तिवाकि हुङज्याराक सुना मागोतक । त्ये होति कि लो न्यङसय तिङला कोन्ज्योक लाक्तु अब्राहमला मागोतक व अब्राहम ख्यो मजिक ङा ख्योला क्योपकोत सुना मागोतक । ङा ख्योला ङान्बा त्येरान सुना मागोतक ।त्ये अब्राहम लाक्तु मागोतक ख्यो ङाला चि ङान्बा त्येरगा तादा टुक्सि ङाला भुजा चिक ता माताज्युङ । ङहि ग्यु नोर तिवा येन मि ला ज्योरज्याराक सुना मागोतक ।त्ये कोन्ज्योक लाक्तु अब्राहमला फिचला खेरनारु नामाङ ज्योकला तोन्गोतक नामाङना होता कार्मा च्योरि खि तिङला ग्यताक मोङबु हुङज्याराक सुना मागोतक ।त्ये कोन्ज्योक लाक्तु मामावा लाप तिला अब्राहम ति हित्छि च्यानारु दागोतक ।दात तानि कोन्ज्योक लाक्तु अब्रहामला छ्योसुम कि मि सम्गोतक ।त्ये होति नाईकि लो मोङबु तिङला अब्राहम लो ग्याईक राङ खुई पाङमा सहाराई लो गुपच्यु कोटोला खोवाला पुजा चिक च्युगोतक ।त्ये खुई पुजा लाम्ला भुजा तिवा मोङबु च्युङगोतक त्ये होति पुजा चिक कि मिन ति ईजरायलि हिनगोतक। इजरायलि नाई मोङबु सन्तन फेल्गोतक होति नाइ कि मिराप दुन ग्यात तिङला कोन्ज्योक लाक्तु इजरायलि न्याबु छिका चिक ज्यागोतक । ख्या ङहि माना न्यादाङमानि ङा ख्या गाङबुकि कोन्ज्योक हुङज्याराक ख्या तिवा ङहि मि हुङज्याराक सुना मागोतक । त्ये तिङला कोनज्योक लाक्तु अब्राहाम ला त्यरान मामावा साज्याति अब्राहम कि सन्तन इजरायलि तिवाला तागोतक त्ये होति साज्या ति इजरायलि तिवा कि ज्युङगोतक ।
