पाउल राङ सिलास
निन्जिक पाउल राङ खुइ रोक ति कोन्ज्योकला छा ज्युक्सा कि साज्या रु ढोवान च्युगितक । होति ना मो देप्कान भुँमु चिक होगोतक ।होति भुँमु ति लाडिकि स्युक लाम्ला मो देप्कान च्युगोतक । त्ये मो देप्कान मि तिवा लाक्तु होति भुमु ति लाम्ला मो तापनारु खुइ दाक्पु ति ला ङुल त्येरगान ज्युगोतक । त्ये मो देप्कान मि तिवा लाक्तु होति भुमु ति लम्ला मो तापनारु खुइ दाक्पु ति ला ङुल त्येरगान ज्युगोतक । होति भुमु ति पाउल राङ खुइ रोक ला थोङनारु खुइ तिङला स्युक नारु कात छ्योबु लाम्ला खोवा कोन्ज्योक कि स्यापताप ढुप्कान मि दाक खोवा लाक्तु मितिवाला दिक्पा नाइ ढोल्ज्याकि लाम ति स्योगान दाक सुना मोङबु मागोतक । त्ये पाउल होति काच्याति मोङबु छोर तानि होति लाँडि तिला ख्यो होति भुँमु नाइकि थोन नारु सोङ सुना मगोतक । त्ये त्यागोटोला होति लाडि ति थोन नारु फिन्गोतक ।त्ये होति भुँमु लाक्तु मो देप मिनेतानि खुइ दाक्पुला ङुल साक मानेगोतक ।त्ये खुइ दाक्पु ति लाक्तु पाउल राङ खुइ रोक तिला जिननारु खुइ ठिम च्योगान मि कि दुन्दु खेरगोतक । त्ये ठिम च्योगान मि तिला मागोतक । खुइ ह्युलबा तिवाला ह्वा कि ठिमला मिडिगान काच्या लोप्तुप सुना पाउल तिवाला खाक काल्गोतक । त्ये ठिम च्योगान मि लाक्तु पाउल राङ खुइ रोक तिला पेर्खा थुतनारु चोनगाङला द्योक सुना माङमि तिवाला मागोतक । त्ये ठिम च्योगान मि लाक्तु चोनगाङ कि छ्योबु तिला मागोतक । खोवाला यि नाङरु येबु तो सुना मागोतक । त्या छउ गोङमुन ति त्या पाउल राङ खुइ रोक ति कोन्ज्योकला छा चुकनारु कोन्ज्योक कि लु चिक ति लेगान च्युगोतक । होति लु ति चोनगाङना होता चोन्बातिवा गाङसि छोरगोतक । त्ये त्या ताङला होतिरु सिङगुल छ्योबु चिक ग्यापकोतक । त्ये सिङगुल ग्याकच्या न्याबु खोवाकि लाक्पा काङबा ला दामदाबा च्याकताक तिवा गाङसि ढोलनारु फिनगोतक चोनगाङकि गोर्सा तिवा गाङसि फा कोवाक नारु फिनगोतक । त्या गोटोला चोनगाङकि मि छ्योबुलाक्तु चोन्बा तिवा गाङसि टोसुनाङ सुना खोरोङ सिया ताप्कि टि जिननारु खोरोङला सुक्पान सिना बिगोतक । त्ये होति काच्या ति पाउल लाक्तु छोरनारु होति मि छ्योबु तिला मागोतक ।ङाया याना होत ख्यो होजुक माबेत सुना मागोतक । त्ये चोनगाङ कि मि छ्योबु ति हुङनारु पाउलकि काङबारु छेयाक चालनारु मोगोतक । दिक्पा नाइ टोल्ज्याला ङा चि बिच्याराकपा सुना मोगोतक। ख्यो येशुला हित्छि चि सुना पाउल लाक्तु मागोतक । त्ये पाउल राङ खुइ रोक लाक्तु खूइ परल गाङसि कोन्ज्योक कि काच्या न्यान्बु ति स्यागोतक । त्ये खुइ परल गाङसि येशुला हित्छि च्यानारु छ्युला स्युक नारु ठु च्यागोतक त्ये तिङला खोवा गाङसि गरि सिनारु छाल्मा सोगोतक ।
